Даваа гарагт ОХУ Украины Одесса хот руу агаараас довтолж, сургуулийн барилгыг оносны улмаас таван хүн амь үрэгдэж, 30 гаруй хүн бэртжээ.
Хүнд бэртэж, биеийн байдал нь тааруу байгаа найман хүний дунд дөрвөн настай хүүхэд байгааг хотын захирагч мэдэгдсэн байна.
Пуужингийн цохилтод өртсөн уг хуулийн сургууль нь Одесса хотын алдартай барилгуудын нэг бөгөөд алдарт Харри Поттер цувралын шидтэний сургууль болох Хогвартсыг санагдуулам загвар хийцтэй тул жуулчдын дунд ч алдартай аж.
Одесса хот нь Украины чухал боомт хот учир Оросын гол байнуудын нэг болоод буй. Өнгөрсөн оны долоодугаар сард ОХУ Хар тэнгисийн замаар үр тарианы экспорт хийх гэрээнээс гарсны дараа тус хотыг бөмбөгдөж эхэлсэн юм.
Энэ үеэр Одесса хотын бас нэгэн чухал барилгуудын нэг болох үнэн алдартны шашны Спасо-Преображенскийн сүм оногдож, сүйдсэн. 18 дугаар зуунд барьж байсан уг сүм нь ЮНЕСКО-ийн хамгаалалтад байдаг.
Сүүлийн өдрүүдэд талууд цахилгаан станцуудыг онилж, агаараас довтолж буй бөгөөд саяхан Украины арми фронт дахь нөхцөл байдал дордож, гурван ч тосгоноос цэргүүдээ татах шаардлагатай болсон талаар мэдээлсэн.
Үүнтэй холбоотойгоор Украины Ерөнхийлөгч зэвсгийн тусламжаа түргэтгэхийг бусад улс оронд уриалж эхэлсэн юм
°C