АНУ Сири улсыг “терроризмыг дэмжигч улс” буюу State Sponsors of Terrorism-ийн жагсаалтаас албан ёсоор хаслаа. Ингэснээр Сирийн эдийн засагт гадаадын хөрөнгө оруулалт татахад саад болж байсан томоохон хязгаарлалт арилж, тус улсын олон улсын санхүүгийн тогтолцоонд дахин нэгдэх боломж нэмэгдэж байна. АНУ-ын Сангийн яамны Гадаад хөрөнгийн хяналтын алба /OFAC/ наймдугаар сарын 24-нд Сирийг уг жагсаалтаас хассан тухай мэдээлжээ. Сири улс 1979 оноос хойш буюу бараг 47 жилийн турш энэ жагсаалтад байсан юм. Энэ шийдвэр нь АНУ-ын Ерөнхийлөгч Дональд Трампын Сирийн эсрэг бодлогыг өөрчлөх хүрээнд гарсан бөгөөд Конгрессын 45 хоногийн хянан хэлэлцэх хугацаа ямар нэгэн эсэргүүцэлгүй дууссаны дараа хэрэгжиж эхэлсэн байна.АНУ-ын Төрийн нарийн бичгийн дарга Марко Рубио Сирийн шинэ засгийн газар олон улсын терроризмоос зайгаа барих чиглэлээр хийсэн алхам болон цаашид хүлээсэн үүрэг амлалтыг уг шийдвэрийн үндэслэл хэмээн тайлбарлажээ.“Терроризмыг дэмжигч улс” гэсэн ангилал нь АНУ-ын гадаад тусламж, батлан хамгаалах салбарын экспорт болон тодорхой санхүүгийн гүйлгээнд хязгаарлалт тавих эрх зүйн үндэс болдог. Үүний улмаас олон улсын банк, санхүүгийн байгууллагууд Сиритэй хамтран ажиллахдаа хууль эрх зүй, нийцлийн өндөр эрсдэлтэй тулгарч байв.Сирийн эрх баригчид жагсаалтаас хасагдсан нь дайны дараах эдийн засгийг сэргээхэд шаардлагатай гадаадын хөрөнгө оруулалтыг татахад тулгарч байсан хамгийн том саадуудын нэгийг арилгасан гэж үзэж байна. Үүний зэрэгцээ олон улсын төлбөр тооцоо, банкны үйлчилгээ болон бизнесийн хамтын ажиллагаа өргөжих боломжтой болжээ.Тухайлбал, Bank of America болон Mastercard зэрэг санхүүгийн байгууллагууд Сирийн зах зээл дэх боломжийг судалж эхэлсэн бөгөөд Mastercard тус улсад олон улсын картын төлбөрийн дэд бүтэц бий болгох боломжийг сонирхож байгаа аж.
°C