Тажикистаны Хужанд хотноо болсон бадминтоны Төв Азийн аварга шалгаруулах тэмцээнээс Монголын баг гурван медальтай эх орондоо ирлээ. Зургаан өдөр үргэлжилсэн тус тэмцээнд Иран, Туркменистан, Тажикистан, Киргиз, Казахстан, Узбекистан, Монгол гэсэн долоон орны 80 гаруй тамирчин өрсөлдсөн бөгөөд манай улсаас дасгалжуулагч Б.Хувьтөгөлдөрийн удирдлагад есөн тамирчин ур чадвар, хурд хүч, авхаалж самбаагаа сорив. Улмаар U16 болон U19 насанд гурван хүрэл медаль хүртжээ. Тодруулбал, U16 насны эмэгтэйчүүдийн ганчаарчилсан төрөлд О.Амин-Эрдэнэ, U19 насны эрэгтэйчүүдийн ганцаарчилсан төрөлд Ү.Өсөх-Ирээдүй, U19 насны эрэгтэй хосын төрөлд Э.Тэмүүлэн, Ү.Өсөх-Ирээдүй нар хүрэл медалиар энгэрээ мялаасан байна. Энэхүү тэмцээн нь Монголын өсвөрийн тамирчдад Төв Азийн бүсийн шилдэг тамирчидтай өрсөлдөж, олон улсын тэмцээний туршлага хуримтлуулах, ур чадвараа сорих чухал боломж байжээ. Түүнчлэн “Айчи-Нагояа 2026” Азийн зуны спортын ХХ наадамд эх орноо төлөөлөн оролцох О.Амин-Эрдэнэ, Ү.Өсөх-Ирээдүй нарын хувьд томоохон сорилуудын нэг байсныг албаныхан онцоллоо.
°C